ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោហ៊ុនសែនបានជំរុញដល់ពលរដ្ឋឲ្យបន្តយកចិត្តទុកដាក់គាំទ្រដល់កីឡាករមានពិការភាព ខណៈការប្រកួតអាស៊ានបារ៉ាហ្គេមកាន់តែជិតចូលមកដល់។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការនៅស្ពានខ្សែកាបកាត់ទន្លសាប និងស្ពានអាកាសឬស្សីកែវព្រឹកថ្ងៃទី៣១ ខែឧសភា ឆ្នាំ២០២៣ សម្ដេចតេជោ ហ៊ុន សែន ថាក្នុងការប្រកួតស៊ីខាងកន្លងទៅកម្ពុជាបានទទួលស្វាគមន៍កីឡាករបានយ៉ាងល្អ ខណៈការរៀបចំអាស៊ានបារ៉ាហ្គេមខាងមុខក៏នឹងត្រូវឲ្យធ្វើល្អបន្ថែមទៀតផងដែរ។ សម្ដេចបានជំរុញឲ្យពលរដ្ឋបន្តគាំទ្រដោយកីឡាករមានពីការភាពទាំងជាតិនិងអន្តរជាតិដែលបានចូលមកលេងនៅកម្ពុជាផងដែរ។
សម្ដេចថា៖ «យើងលើកទឹកចិត្តជនពិការរបស់យើងយើងលើកទឹកចិត្តជនពិការក្នុងក្របខ័ណ្ឌអាស៊ានរបស់យើង»។
សម្ដេចថាការគាំទ្រកីឡាករមានពិការភាពក្នុងប្រទេសសមាជិកអាស៊ានបានជំរុញសមហរណកម្មអាស៊ាន ដែលជាផ្នែកមួយនៃការជំរុញទំនាក់ទំនងរវាងប្រជាជននិងប្រជាជនអាស៊ាន៕
